Presidenti i Ukrainës, Volodymyr Zelenskyy në lidhje me fitoren e vendit të tij në Festivalin e 66-të të Këngës “Eurovizion 2022” i cili këtë vit u mbajt në Itali tha se do të punojnë për të pritur pjesëmarrësit dhe të ftuarit e Eurovizionit në Mariupolin ukrainas, transmeton Anadolu Agency (AA).

Në një deklaratë nga llogaria e tij në Telegram, lidhur me fitoren e Eurovizionit të këtij viti nga “Orkestra Kalush” që përfaqësoi Ukrainën me këngën “Stefania”, Zelenskyy tha se muzika e Ukrainës dhe guximi i ukrainasve kanë ndikuar Evropën.

“Vitin e ardhshëm Ukraina do të presë Eurovizionin, për herë të tretë në historinë e saj dhe besoj se nuk është hera e fundit”, tha ai.

Për qytetin Mariupol i cili ende është nën rrethimin rus, Zelenskyy tha: “Ne do të bëjmë më të mundurën tonë për të pritur pjesëmarrësit dhe të ftuarit e Eurovizionit një ditë në Mariupolin ukrainas”.

Ai falënderoi ekipin që përfaqësoi Ukrainën në këtë aktivitet duke thënë: “Jam i sigurt se korda jonë fitimtare në betejën me armikun nuk është larg”.

Kujtojmë se Ukraina ka fituar Festivalin e Këngës “Eurovizion” në vitet 2004 dhe 2016.